Mon liberté

Mon liberté na bo soubat’ oussa ti lé

Sak bout la terre ma la fouillé

Moin la rode a toué

Oui vers bon dié nout’ main tendi

Nou la tourné ; in mir la tombé

Largue in prisonnier

Toué ou ça ti lé

A force entend ‘ chacun’ raconte son façon

Chacun’ nana la manièr trouve in solition

Oh ! oui nou lé la a force attend’

Nou va prend’ racine ek mauvais zherb’

Appel ça la paille vitamine

Si mon couraze i suffi jist po moin couri

Fo chavire vapèr avant lorage avant la pli

Mon ker y fé mal quand la misèr’ y entoure a moin

Quand mi wa la guerre quand na encore marmaye

y crève la faim

Mon liberté na bo soubat ou ça ti lé

Mon liberté mon liberté ou ça ti lé

Lé vré in rêv’ c’est kan nou essaye maginé

Commen y lé la vie sans son réalité

Coté bon dié mon liberté moin la rodé

Mon reve té y monte , té y monte ek la fimé

Petèt’ demain na war in aut’ zistoir

Pétèt’ la vie in souvenir dans mon mémoir’

Moin na bo crié, moin na bo pléré

La pli va tombé

Le temps va passé

Di à moin jist kel lhèr y lé

Quand nout’ prière va casse toute mur

Rouve toute prison

Nora pi la guerre pou in coulèr

Pou in réligion

Chaque jour y lève , nora son raison existé

Chaque soleil nora ton coulèr

Mon liberté

Salimina Bernard